“Muğanın səsi”

 AYB Muğan Bölməsinin poeziya toplusu işıq üzü gördü

 Azərbaycan Yazıçılar Birliyi Muğan Bölməsinin xətti ilə işıq üzü görən “Muğanın səsi” poeziya toplusunun ilk sayı çapdan çıxmışdır. Topluda AYB Muğan Bölməsinin tərkibinə daxil olan Hacıqabul, Şirvan, Salyan və Neftçalanın 60 şairinin yaradıcılığından örnəklər yer alıb. “Muğanın səsi” poeziya toplunusunu AYB Muğan Bölməsinin başqanı Namiq Hacıheydərli toplayıb tərtib etmişdir. Kitabın redaktoru professor-doktor Əjdər Ağa(yev), məsləhətçisi professor -doktor İmamverdi Əbil(ov), rəyçisi ATXƏM  başqanı İlham İsmayıldır. Kitaba tanınmış şair Musa Ələkbərli  “Axtarışda olan şair...” adlı ön söz yazmışdır.
 Bu toplu Muğan şairlərinin yaradıcılığından örnəkləri özündə cəmləşdirən ilk nəşrdir. Topluda imzası bəlli şairlərlə bərabər, ədəbi ictimaiyyətə ilk dəfə təqdim edilən şairlər də var. “Muğanın səsi” toplusunda  yaradıcılığa XVIII yüzilin sonlarında başlamış  M.B.Nadim (Hacıqabul),  XIX yüzilin ortalarında  başlamış Qasım Həsənoğlu, Məşədi Əmrah (Salyan) kimi klassik şairlərdən tutmuş ilk qələm təcrübələri ilə çıxış edən yeni nəslə qədər böyük bir dövr əhatə olunmuşdur.