“Bu faktı bəzi köşə yazarları görməzliyə vururlarsa...”

"Bəs nə üçün Türkiyənin bəzi köşə yazaları bizim Fransa səfirliyi qarşısında təşkil etdiyimiz aksiyalardan yazmaq istəmirlər?"

Bu sözləri “Qafqazinfo”ya bir neçə dəfə Fransa səfirliyi qarşında keçirilən aksiyanın təşkilatçılarından, Azərbaycan Vətən Müharibəsi Veteranları Birliyinin sədr müavini Mübariz Quliyev Türkiyə mediasında bəzi köşə yazarlarının Azərbaycan əleyhinə çıxan yazılarını şərh edərkən bildirib.
“İlk gündən Fransa Senatı tərəfindən qondarma “erməni soyqırımı”nı inkar etməyə görə cəza verilməsini nəzərdə turan qanunu qəbul etməsindən sonra Beynəlxalq Diaspor Mərkəzi ilə birgə Fransa səfirliyi qarşısında etiraz aksiyaları keçirilməsində ən çox təşəbbüs göstərən və həyata keçirən birlik olmuşuq. Türkiyə mediası buna diqqət ayırdı və ölkənin nüfuzlu media orqanları, televiziyaları aksiyaları geniş şəkildə işıqlandırdılar. Bu fakti Türkiyənin bəzi köşə yazaları görməzliyə vururlarsa, bu, ədalətsizlikdir. Azərbaycan dövləti, xalqı hər zaman qardaş Türkiyənin yanında olub, bundan sonra da olacaq”, - deyə Mübariz Quliyev bildirib.
Mübariz Quliyev bundan sonra da Türkiyənin haqq səsinin dəstəklənməsində öz səylərini gücləndirəcəklərini bildirib.
“Türkiyəyə gələ biləcək bütün təhlükələri Azərbaycana qarşı yönəlmiş hesab edirik və Fransa dövlətinin ATƏT-in Minsk qrupu həmsədrliyindən çıxarılması ilə bağlı Türkiyənin qaldırdığı təşəbbüsləri dəstəkləyirik. Hesab edirik ki, Fransa bundan sonra bu qurumda münaqişənin həllində vasitəçilik missiyasını apara bilməz”,-deyə Qarabağ qazisi qeyd edib.

Elnur Eltürk