Az.TV-nin «Azərbaycantelefilm» Yaradıcılıq Birliyində «Bəstəkar Oqtay Rəcəbov» və «Dəli Alı» sənədli televiziya filmlərinin istehsalı başa çatıb.
Bu barədə Lent.az-a “Azərbaycan Teleradio Verilişləri” QSC-nin mətbuat xidmətidən məlumat verilib. Film tanınmış bəstəkar Oqtay Rəcəbovun yaradıcılığına və pedaqoji fəaliyyətinə həsr olunub. Ekran əsərində onun müxtəlif janrlarda bəstələdiyi musiqi əsərlərindən, musiqi təhsilinə gətirdiyi yeni təlim sistemindən söz açılır.
Filmin ssenari müəllifi Yaqub Əlioğlu, rejissoru Ənvər Əbluc, operatoru Mətləb Yaqubovdur.
«Dəli Alı» filmi 1898-1917-ci illərdə çar üsuli-idarəsinə qarşı çıxan, erməni daşnaklarına öz silahdaşları ilə birlikdə divan tutan qaçaq Alı (Alı Məhərrəmov) haqqındadır. Qaçaq Alı ermənilərin Gəncədə törətdikləri qırğının qarşısını alan igid kimi Azərbaycan tarixinə daxil olub. Çəkilişlər Qazax, Goranboy, Daşkəsən bölgələrində aparılıb.
Filmin ssenari müəllifi Xanlar Bayramov, rejissoru Şahəddin Elxan Mayıloğlu, operatoru Elxan Nəbiyevdir.
(Qaynaq: Lent.az/Lalə Yusifqızı)
Şərhlərə görə (0 göndərilib)
YENİLİKLƏR