Dərdim sizdən mərd imiş...

    Tural İRFAN

    BİR ULDUZ AXDI YERƏ

  Bir ulduz axdı yerə,
  Göyə yazığım gəldi.
  Bir bülbül köçdü bağdan,
  Gülə yazığım gəldi.

  Alışıb sönəmməyən,
  Lal olub dinəmməyən,
  Eşqini deyəmməyən
  Dilə yazığım gəldi.

  Hamı düşmür bir dərdə,
  Qanlar udur günlər də...
  Ay nə çəkir ömürdə -
  İlə yazığım gəldi.

   ...MƏNDƏN AYRI

Məni sevmisənsə, daha kimisə
Həmdəm biləmməzsən sən məndən ayrı.
Ən gizli sirrini mənə demisən,
Dərdi böləmməzsən sən məndən ayrı.

İlk eşqin
          …gözünün yaşı məndədir,
Qəfəs taleyinin quşu məndədir,
O, bəxt üzüyünün qaşı məndədir,
Daha sevəmməzsən sən məndən ayrı.

Mən sənsiz yalanam, sən mənsiz yalan!..
Xoşbəxtlik axtarma mənsiz heç zaman.
Sevincin mənlədi, kimləsə inan,
Deyib - güləmməzsən sən məndən ayrı.

...Dönük qala bilməz həmişə üzün,
Qəlbini deşəcək bir gizli sözün,
Son nəfəsdə məni gəzəcək gözün,
Heç vaxt öləmməzsən sən məndən ayrı!..
       31.01.07

 MƏN SƏNDƏN KÜSMƏMİŞƏM
 
Salam verdim dinmədin,
Mən tərəfə dönmədin,
Heç üzümə gülmədin,
Mən səndən küsməmişəm.

Yanıram, alışmırsan,
Dinirəm, danışmırsan,
Küsmüsən, barışmırsan,
Mən səndən küsməmişəm.

Qəriblər tək baxırıq,
Küsməklə yarışırıq?
Deyəsən barışırıq-
Mən
səndən küsməmişəm...       

 
 
  DİLSİZ KÖNÜL

Çəmənlər nəğməsiz qalmasın təki,
Bülbül ağlayarmış gülsüz qalanda.
Ürək alışarmış, göz yaşararmış,
Könül kövrələrmiş dilsiz qalanda...
   

SEVGİM VƏ NİFRƏTİM
(Sadə şeir)

Allahımı sevirəm, O mənə həyat verib,
Rəsulunu sevirəm, o mənə qanad verib.
Kitabımı sevirəm, o mənə  yol göstərib.
Həqiqəti sevirəm - bəşərin qeyrətidi,
Ədaləti sevirəm - çün kişi sənətidi.
Vətənimi sevirəm - əbədi məhəbbətdi…
nifrətim  şeytanadı -
bizi yoldan azdırıb.
nifrətim zülmətədi,
bizi candan bezdirib.
Erməniyə nifrət edirəm,
Vətənimi parçalayıb!
...
“Atom”a nifrət edirəm,
dünyanı parçalayıb.
…Amma biri var ki,
ona nifrət edəmmirəm,
baxmayaraq o işvəli,
ürəyimi parçalayıb!!!

05.04.08

DƏRDƏ TƏŞƏKKÜR

…

Dərdim sizdən mərd imiş
Məni şair elədi!!!

13.09.08