Özünü gətir

 Eluca ATALI
 

 (fəlsəfi-bədii miniatür)

 Bizə gəl...
 Tək gəl, daha heç nə istəmirəm!
 Əllərin  boş, yanında, havada yellənə-yellənə.
 Ayağın altında özgə cığırın izindən qalmasın torpaq.
 Təkcə dəniz kənarından keçəsi olsan, onda gərək olmaz ayaqlarını yerə möhkəm vurasan. Nə lazım olanları qumluğa zərblə çırpasan. Onsuz da qum özgə ayağa ilişib qalmaz. O, doğmadır öz sahili üçün.
 Sən ayağını qaldırıb yeni ləpir salanda, o əvvəlki ləpirə sürüşüb düşər.
 Üsyan et, adamı özündən ayıranlara.
 O,əl telefonunu sal sındır, çal daşa, baxma bahalığına!
 Əşyalar artdıqca heçləşir insan. Insanı özündən ayırır onlar. Ya da qapa, qoy bir kənara. Yad, kənar səslsri doldurma qulaqlarına.
 Saatını aç! Aç, tulla çox uzaqlara, lap qolun getdikcə. Əgər dəniz kənarından gəlirsənsə, ləpələrə qoş aparsın dərinliyə!
 Əgər evdən birbaşa gəlirsənsə, özünlə götürməyi heç düşünmə. Qoy qalsın masa üstündə, ya da elə qaldığı yerdə, səni gözləyə-gözləyə.
 Zaman nədir ki, özünü ona təslim edəsən? Varlığını boş çərçivəyə pərçimləyəsən!
 Mən səni zamanla gözləmirəm.
 Özün gəl, tək özün.
 Əllərin yanında, hava boşluğunda azad oynaya - oynaya.
 Təkcə özümlüyünü özünlə gətir.
 Yolda çaşıb başqa səmtə dönməyəsən deyə!
 

 6 Arzu Günü,Şölə Ayı,26-cı il