Əzrayıl can alır mələk donunda

BAĞMAN BABA 

 XƏBƏRİN VARMI?

 Mənə can-can deyən dostum,
 İçimdən xəbərin varmı?
 Ömür ötür, an gözləmir,
 Köçümdən xəbərin varmı?

Sahibi var lal daşın da
Fərman verir hər yaşında.
Qəbir qazan iş başında,
Biçimdən xəbərin varmı?

 Xeyir-şərimdə olmadın,
 Öldüm, yerimdə olmadın,
 Dünən birimdə olmadın
 Üçümdən xəbərin varmı?

Səhər haqqı, axşam haqqı
Peşəm anda qurşamaqdı.
Ölüm də bir yaşamaqdı,
Seçimdən xəbərin varmı?

 Xəyal köhlən atındadı,
 Göyün yeddi qatındadı.
 Ruhum hər gün qapındadı,
 Elçimdən xəbərin varmı?

 YENƏ O QIZ YADA DÜŞÜB

Göz önünə gəlib, getməz
Xəyalların sonu bitməz,
Əlim çatmaz, ünüm yetməz,
Yenə o qız yada düşüb.

Nə xoş gecə, bu gecə xoş
Həsrətindən oldum naxoş,
Ürəyimdə yeri bom-boş
Yenə o qız yada düşüb.

O deyərdi axı mənə -
Bir şeir yaz-oxu  mənə.
Haram olub yuxu mənə
Yenə o qız yada düşüb.

Toy libaslı, başında tac,
Hörükləri qulac-qulac.
Gözlərim görməyə möhtac
Yenə o qız yada düşüb.

 SİNƏMİN ÜSTÜNƏ BİR MƏLƏK QONUB

Diksinib ayıldım, yuxumdan, Allah,
Keçərəm varımdan-yoxumdan, Allah,
Sarılıb, yapışıb yaxamdan, Allah,
Sinəmin üstünə bir mələk qonub.

Saçları payızın sarmaşığıdı,
Gecəylə gündüzün qarışığıdı,
Göylərdən ələnən nur işığıdı
Sinəmin üstünə bir mələk qonub.

İlahi! Yaşayır göz yaşlarıyla
Cəllada dönübdü göz-qaşlarıyla.
Məni ovsunlayıb baxışlarıyla
Sinəmin üstünə bir mələk qonub.

Telə sığal çəkir külək donunda,
İşlədir min hiylə, kələk donunda,
Əzrayıl can alır mələk donunda,
Sinəmin üstünə bir mələk qonub.