İhsan Doğramaçı vəfat edib

 AMEA-nın fəxri üzvü 95 yaşında dünyasını dəyişib
 Türkiyə Ali Təhsil Şurasının (Yüksək Oyrətim Kurulu (YÖK)) yaradıcısı, dünya şöhrətli pediatr İhsan Doğramaçı vəfat edib.
 Lent.az-ın Türkiyə mətbuatına istinadən məlumatına görə, İhsan Doğramacı 1915-ci ildə İraqın Ərbil şəhərində anadan olub. Dünya şöhrətli pediatr 1938-ci ildə İstanbul Tibb Fakültəsini bitirdikdən sonra ixtisasartırma kurslarını Ankara Nümunə Xəstəxanasında keçirib.
 1949-cu ildə Ankara Universiteti Tibb Fakultəsində dosent, 1954-cü ildə isə professor olub. O, Uşaq Sağlamlıq İnstitutunun, Hacəttərə Tibb və Səhiyyə Elmləri fakültəsinin, Hacəttərə Universitetinin yaranmasında böyük rol oynayıb.
 İhsan Doğramacı Ankara Universitetinin rektoru (1963-1965), Şərq orta Texniki Universitetinin heyət rəhbəri (1965-1967), Hacəttərə Universitetinin rektoru (1967-1975) olub. Sonra isə Paris Universitetinə müəllim təyin edilib.
 1964-1973-cü illər arasında Avropa Rektorlar Konfransının idarə heyətinin üzvü, 1981-ci ildən bu günə qədər Millətlərarası Ali Təhsil Konfransında idarə heyətinin üzvü, sədr və fəxri sədr vəzifələrində çalışan İhsan Doğramacı bu yolla bir çox ölkələrin ali təhsil idarəetmə sistemlərini yaxından öyrənib.
1981-1992-ci illər arasında YÖK-ün sədri olan İhsan Doğramacı həmçinin, Bilkənd Universitetinin idarə heyətinin sədri olub.
 İhsan Doğramacı Hindistan Milli Tibb Akademiyası, Fransa Tibb Elmləri Akademiyası, Amerika Pediatr Akademiyası, AMEA-nın fəxri üzvüdür.