Sözlə gəlir bu dünyaya şair olan

ZƏRƏNGİZ QAYALI 

 BAYATILAR

 20 ildir ki, torpağımızda ədalətsiz müharibə gedir, 
 18 rayonumuz düşmən tapdağındadır

 Xırman üstü dən olur,
 Çox gəlib-gedən olur,
 Fələkdə nə qaydadı,
 Zülm üstdən sitəm olur?

Əzizim, yada düşdü,
Qəlbimə qada düşdü,
90-cı qirğında,
18 yada düşdü!

 Sovrulduq saman kimi,
 Qovrulduq şaman kimiş
 Sellər, sular çağlayır,
 Gözümü yuman kimi!
 
Fələk yolu bağladı,
Didəm qanlar ağladı,
Əsir dərdi, ay ellər,
Ürəyimi dağladı!

 Əzizim, yada qaldı,
 Ya qırğın, ya da qaldı!
 Şəhid oldu Xocalım,
 Torpağım yada qaldı!

Atım var, yüyənim yox,
Qapımı döyənim yox,
Ədalətim tapdanır,
Haqqımı deyənim yox!

 Aşiqəm belə qalmaz,
 Su çağlar selə qalmaz,
 Bir gün yenilər düşmən,
 Qisasım belə qalmaz!
                     27.12.06

 DÜNYADA

 Elə özü boyda heyrətmiş demə,
 Nə qədər gözəllik varmış dünyada?
 Bir zərif çiçəklə aldı könlümü,
 Bütün qayğılarım qaldı arxada!

 İnsan gəlir-gedir, bir tarix olur,
 Ömür ötüb-keçir, o yaşa dolur,
 Hərə bir iz qoyur, ruhlarsa solur,
 Xəyal kəpənəyi, uçur havada.

 Ömrümün sahibi sən oldun, ya Rəb!
 Dərdim saçlarımda dən oldu, ya Rəb!
 Həzin-həzin yazan mən oldum, ya Rəb!
 İki kəlmə sözüm qalar dünyada!
                                              3/3-2010
   
 VƏTƏN

Bir ovuc torpağam, bir ovuc qanam,
Məni şair doğdu dünyaya anam!
Sənin eşqin ilə alışıb-yannam!
Külüm də qurbandı gülünə, Vətən!
Gülüm də qurbandı külünə, Vətən!

Sevdalı dağların baş-başa durar,
Qartal qanad çalar, şahin qıy vurar,
Əlim yara bağlar, dil səni sorar,
Bənövşə düzərəm telinə, Vətən!
Qayıdaq Kəlbəcər elimə, Vətən!

Xan Araz, dəli Kür axar qanımdan,
Savalan yelləri əsər canımdan,
Elə nigaranam Həştərxanımdan,
Dərbənd əl uzatsın əlimə, Vətən!
Qurban olum Təbriz elinə, Vətən!

Şuşam yad əllərdə, gülləri xəzan,
Tapılmır bəd gələn yuxumu yozan,
Yurduma sevdalı, vəfalı qızam,
Qayıt Zəngilanın selinə, Vətən!
Urud, Vedi, Laçın yelinə, Vətən!

Anam Xəzər kimi qaynayam, coşam,
Vətənim, hüsnünə nəğmələr qoşam,
Zərəngiz Dəmirçi, sanki bihuşam,
Xarıbülbül bənzər gəlinə, Vətən!
Qayıdaydıq sənin gülünə, Vətən!
Çıdır düzü, Şuşa çölünə, Vətən!
                             8/9-2009-cu il

 SÖZLƏ GEDİR

Şair sözü-yaranışdan haqq deməkdir,
İlahidən qurulmuş bir taxt deməkdir,
Bəlkə elə göydən gələn baxt deməkdir,
Sözlə gəlir bu dünyaya şair olan!
Sözlə gedir bu dünyadan şair insan!

 DÜNYA SINAQ MEYDANIDIR

Mən qırıq ney kimiyəm,
Min amanım, min qəmim  var,
Sokrat, Qaliley kimiyəm,
Hikmət dolu aləmim var!

Tanrı mənə şeir dolu,
Nəğmə dolu dünya verdi,
Ömür yüküm-sözüm, boxçam,
Hər sözümə məna verdi.

Zərəngiz Dəmirçi bilməz,
Ömür keçdi, ələ gəlməz,
Dünya sınaq meydanıdır.
Kimə gülər, kimə gülməz!